Albania News Agency

Ministri i Punëve të Jashtme i Maqedonisë së Veriut, Timço Mucunski, deklaroi se gjatë takimit me të ngarkuarën me punë të SHBA-së, Nicole Varnes, përcolli urimet e tij me rastin e 250-vjetorit të pavarësisë së Shteteve të Bashkuara, duke e cilësuar këtë si një moment historik dhe dëshmi të forcës së qëndrueshme të demokracisë amerikane.

Mucunski tha se rikonfirmoi partneritetin e fortë ndërmjet dy vendeve, të bazuar në besimin reciprok, vlerat e përbashkëta dhe interesat strategjike të përbashkëta.

Ai shtoi se gjatë takimit me Varnes u diskutuan përgatitjet për Samitin e NATO-s që do të mbahet në Ankara, si dhe angazhimi i përbashkët për avancimin e objektivave të miratuara në samitin e mëparshëm.

Mucunski tha: “Shqyrtuam hapat e ardhshëm për zbatimin e prioriteteve të Sesionit të Dytë të Dialogut Strategjik, me fokus në iniciativa konkrete dhe bashkëpunim më të fortë institucional.”