Albania News Agency

NASA njoftoi se është përfunduar një fazë e rëndësishme e përgatitjeve për lëshimin e Teleskopit Hapësinor Nancy Grace Roman.

Sipas deklaratës, më 25 korrik teknikët ngarkuan në teleskop rreth 290 galonë karburant hidrazinë në një objekt të Qendrës Hapësinore Kennedy në Florida.

U bë e ditur se pas lëshimit, Teleskopi Hapësinor Roman do të përdorë sistemin e tij të shtytjes për të arritur pikën e Lagranzhit Diell–Tokë L2, e cila ndodhet rreth 1 milion milje larg Tokës. Teleskopi pritet të kryejë atje misionin e tij kryesor pesëvjeçar, ndërsa falë sasisë së karburantit që disponon, misioni mund të zgjatet edhe për pesë vjet të tjera.

NASA bëri të ditur se panelet diellore të teleskopit i janë nënshtruar gjithashtu kontrolleve para lëshimit dhe se pas furnizimit me karburant ai do të lidhet me shkallën e sipërme të raketës dhe do të vendoset brenda mbulesës mbrojtëse të ngarkesës.

U theksua se Teleskopi Hapësinor Roman do të përdoret për të studiuar mijëra ekzoplanete, si dhe për kërkime mbi energjinë e errët dhe shpejtësinë e zgjerimit të universit.

NASA njoftoi se lëshimi i Teleskopit Hapësinor Roman me raketën SpaceX Falcon Heavy nga Qendra Hapësinore Kennedy është planifikuar për më 30 gusht.