Albania News Agency

Kryeministri i Hungarisë Viktor Orban bëri një deklaratë në lidhje me nënkryetarin e Parlamentit Evropian Nicu Stefănuță.

Duke kritikuar situatën e përgjithshme ekonomike në Evropë, Orban tha: “Zëvendëspresident Nicu Stefănuță, ju patët guximin t’u jepni mësim hungarezëve në Parlamentin Evropian dhe t’i inkurajoni të votojnë kundër nesh. Para se ta bëni këtë, ndoshta duhet të hidhni një sy në Evropë. Në të gjithë kontinentin ka masa shtrënguese, pushime nga puna dhe mbyllje fabrikash”.

Duke theksuar se prioritetet e Hungarisë janë të ndryshme nga ato të Brukselit, Orban tha: “Ndërkohë, në Hungari kemi siguruar mundësi pune për këdo që dëshiron të punojë, kemi vendosur përjashtim të përjetshëm nga tatimi mbi të ardhurat për nënat me dy ose më shumë fëmijë, kemi rritur pagën minimale edhe me 11 për qind, kemi vendosur kredi për banesa me normë fikse 3 për qind për të rinjtë dhe kemi zgjeruar mbështetjen për familjet. E gjithë kjo është e mundur sepse ne i mbajmë paratë tona në Hungari në vend që t’i dërgojmë në Ukrainë”.

Orban e përfundoi deklaratën e tij me fjalët: “Ky është ndryshimi midis politikës së Brukselit dhe prioriteteve hungareze: ne e vendosim popullin tonë mbi gjithçka! Si shenjë e vullnetit të mirë, u përmbajta nga komentimi i gjendjes së ekonomisë së Rumanisë”.