Albania News Agency

Ministri i Jashtëm i Ukrainës, Andrii Sybiha, reagoi ndaj akuzave të Rusisë se Ukraina ka kryer një sulm ndaj rezidencës së Putinit.

Sybiha tha: “Ka kaluar pothuajse një ditë dhe Rusia ende nuk ka paraqitur dhe as nuk do të paraqesë ndonjë provë bindëse për sulmin e supozuar të Ukrainës ndaj rezidencës së Putinit, sepse një sulm i tillë nuk ka ndodhur”.

Ai shprehu shqetësim për faktin se disa shtete kanë bërë deklarata shqetësimi për një sulm që nuk ka ndodhur, ndërsa më herët kanë heshtur ndaj goditjes së një rakete ruse ndaj një ndërtese qeveritare në Ukrainë.

Duke theksuar se Rusia përdor dezinformimin si një metodë sistematike, Sybiha u shpreh: “Rusia ka një histori të gjatë pretendimesh të rreme. Reagime të tilla ndaj pretendimeve të pabaza dhe manipuluese të Rusisë i shërbejnë propagandës ruse dhe e inkurajojnë Moskën për më shumë mizori dhe gënjeshtra”.

Sybiha u bëri thirrje të gjitha shteteve të mos u japin rëndësi pretendimeve të paverifikuara.