Albania News Agency

Zëvendëskryeministri dhe ministri i Jashtëm i Italisë, Antonio Tajani, njoftoi se Italia mbështet hapjen e grupit të tretë të negociatave në procesin e anëtarësimit të Serbisë në Bashkimin Evropian.

Në një postim në rrjetet sociale, Tajani tha se zhvilloi një shkëmbim mendimesh me presidentin serb Aleksandar Vuçiq mbi procesin e ribashkimit të Evropës dhe integrimin e Ballkanit Perëndimor në Bashkimin Evropian.

Tajani theksoi rëndësinë që të gjitha vendet e Ballkanit, përfshirë Serbinë, të jenë pjesë e procesit të anëtarësimit në Bashkimin Evropian (BE), duke shtuar se administrata e Beogradit duhet të mbështetet në zbatimin e reformave.

Tajani bëri të ditur se gjatë bisedës u diskutua edhe lufta në Ukrainë dhe se u ritheksua rëndësia e vazhdimit të mbështetjes për Kievin.

Ai shtoi se edhe Serbia ndan angazhimin për mbështetjen e qeverisë së Ukrainës dhe për fillimin e një procesi negociues që do të krijojë bazat për një paqe të drejtë dhe të qëndrueshme në luftën Rusi-Ukrainë.