Albania News Agency

Presidenti i Kinës, Xi Jinping, i cili ndodhet për një vizitë zyrtare në Egjipt, u takua sot në Kajro me Presidentin e Egjiptit, Abdulfettah es-Sisi.

Në takimin me Sisin pas ceremonisë së mirëseardhjes, Xi tha se gjatë 70 viteve që nga vendosja e marrëdhënieve diplomatike mes dy vendeve, marrëdhëniet dypalëshe janë zhvilluar mbi parimet e barazisë dhe besimit të ndërsjellë, të mësuarit miqësor nga njëri-tjetri, bashkëpunimit në harmoni dhe bashkëpunimit me përfitim të ndërsjellë.

Duke vënë në dukje se vitet e fundit janë shënuar zhvillime të rëndësishme në partneritetin gjithëpërfshirës strategjik Kinë-Egjipt, Xi theksoi se përballë kushteve komplekse dhe të paqëndrueshme ndërkombëtare dhe rajonale, dy vendet duhet të mbështesin njëri-tjetrin, të thellojnë bashkëpunimin dhe të avancojnë vazhdimisht ndërtimin e komunitetit Kinë-Egjipt me një të ardhme të përbashkët.

Xi renditi pritshmëritë e tij për zhvillimin e marrëdhënieve dypalëshe si më poshtë:

-Kina dhe Egjipti duhet të mbështesin me vendosmëri njëri-tjetrin, të vazhdojnë kontaktet e nivelit të lartë dhe njëkohësisht të forcojnë kontaktet dhe bashkëpunimin në çdo nivel dhe në çdo fushë.

-Të dyja palët duhet të rrisin harmonizimin mes strategjive të zhvillimit dhe të shfrytëzojnë potencialin e bashkëpunimit në sektorë tradicionalë si infrastruktura, energjia, bujqësia dhe teknologjitë e telekomunikacionit. Ato duhet gjithashtu të krijojnë fusha të reja bashkëpunimi në energjinë e gjelbër, automjetet elektrike, aviacionin dhe hapësirën, ekonominë digjitale dhe teknologjitë moderne bujqësore.

-Të dy vendet duhet të intensifikojnë komunikimin dhe bashkëpunimin në një gamë të gjerë fushash, veçanërisht në kulturë, arsim, shkencë dhe teknologji, shëndetësi dhe sport, si dhe të shtojnë kontaktet mes popujve për të rritur mirëkuptimin e ndërsjellë.

-Kina dhe Egjipti duhet të forcojnë bashkëpunimin në fushën e sigurisë, të luftojnë së bashku krimin ndërkombëtar, të thellojnë bashkëpunimin ndërkombëtar kundër korrupsionit, të mbështesin me vendosmëri përpjekjet e njëri-tjetrit kundër terrorizmit dhe të mbrojnë sigurinë e përbashkët.

-Të dyja palët duhet të forcojnë më tej koordinimin dhe bashkëpunimin në platforma shumëpalëshe si Kombet e Bashkuara dhe BRICS dhe të çojnë përpara së bashku zhvillimin e Forumit të Bashkëpunimit Kinë-Vendet Arabe dhe Forumit të Bashkëpunimit Kinë-Afrikë. Ato gjithashtu duhet t’i kundërvihen së bashku unilateralizmit dhe imponimit dhe të promovojnë ndërtimin e një sistemi global qeverisjeje më të drejtë dhe më racional.

Presidenti egjiptian Sisi tha gjithashtu se ishin shumë të kënaqur me vizitën historike zyrtare të Xi Jinping në Egjipt në 70-vjetorin e vendosjes së marrëdhënieve diplomatike mes dy vendeve.

Sisi tha se që nga vendosja e marrëdhënieve diplomatike mes Egjiptit dhe Kinës, marrëdhëniet dypalëshe janë zhvilluar në mënyrë të shëndetshme dhe të qëndrueshme dhe janë arritur rezultate të rëndësishme e pozitive në bashkëpunimin në fusha të ndryshme. Ai tha se Egjipti, i cili i përmbahet parimit të Një Kine, po punon për zhvillimin e mëtejshëm të partneritetit gjithëpërfshirës strategjik mes dy vendeve.

Sisi tha se janë të gatshëm të intensifikojnë bashkëpunimin me Kinën në fusha si tregtia, investimet, prodhimi, infrastruktura, financat, shkenca dhe teknologjia dhe energjia e re, për t’u sjellë më shumë përfitime dy popujve dhe për të kontribuar më shumë në zhvillimin dhe prosperitetin rajonal. Sisi shtoi se dëshirojnë gjithashtu të forcojnë komunikimin në fushën e sigurisë ushtarake dhe të shtojnë kontaktet mes popujve.

Duke theksuar se Kina, si anëtare e përhershme e Këshillit të Sigurimit të Kombeve të Bashkuara, luan një rol të rëndësishëm dhe konstruktiv në çështjet ndërkombëtare, Sisi theksoi se Egjipti është i gatshëm të forcojë koordinimin dhe bashkëpunimin me Kinën në platformat shumëpalëshe për të përballuar së bashku sfidat globale dhe për të mbrojtur drejtësinë dhe barazinë ndërkombëtare.

Dy liderët zhvilluan gjithashtu një shkëmbim të gjerë pikëpamjesh mbi situatën në Lindjen e Mesme.

Xi Jinping tha se Kina mbështet vendet e rajonit në zhvillimin e marrëdhënieve të fqinjësisë së mirë dhe miqësisë dhe në krijimin e një arkitekture të re sigurie për Lindjen e Mesme duke përqafuar një koncept të përbashkët, gjithëpërfshirës, bashkëpunues dhe të qëndrueshëm të sigurisë.

Xi tha se duhet të nxitet dinamika e brendshme për sigurimin e sigurisë së përbashkët të rajonit dhe të forcohet qeverisja gjithëpërfshirëse, duke theksuar nevojën për forcimin e bazës së sigurisë së përbashkët. Duke nënvizuar se zhvillimi është rruga themelore drejt paqes dhe stabilitetit të qëndrueshëm në Lindjen e Mesme, Xi bëri thirrje për rritjen e koordinimit ndërkombëtar për sigurinë e përbashkët të rajonit.

Sisi, nga ana e tij, tha se Egjipti vlerëson qëndrimin e qëndrueshëm, objektiv dhe të paanshëm të Kinës ndaj çështjeve të Lindjes së Mesme.

Duke theksuar se Egjipti po punon për uljen e tensioneve në rajon, zgjidhjen politike të mosmarrëveshjeve dhe konflikteve dhe arritjen e sigurisë dhe zhvillimit në rajon, Sisi tha se do të vazhdojnë të forcojnë koordinimin me Kinën për të ulur tensionet në Lindjen e Mesme, për të ruajtur stabilitetin rajonal dhe për të krijuar një kornizë rajonale sigurie.

Pas takimit, dy liderët dëshmuan nënshkrimin e një numri dokumentesh bashkëpunimi që mbulojnë fusha si Nisma “Një Brez, Një Rrugë”, inteligjenca artificiale, ekonomia, tregtia, industria dhe zinxhirët e furnizimit.

Të dy vendet publikuan gjithashtu “Deklaratën e Përbashkët për Thellimin e Mëtejshëm të Partneritetit Gjithëpërfshirës Strategjik ndërmjet Republikës Popullore të Kinës dhe Republikës Arabe të Egjiptit”.

Në kuadër të vizitës së Xi në Egjipt u nënshkruan gjithashtu më shumë se 20 dokumente bashkëpunimi në fusha të ndryshme, veçanërisht në ekonominë digjitale, shkencë dhe teknologji, arsim dhe transport.