Albania News Agency

Presidenti Zelenski theksoi se Rusia mbrëmë ka shpallur sërish luftë ndaj infrastrukturës kritike dhe ndërtesave të zakonshme të banimit.

Ai bëri të ditur se ndaj popullit ukrainas janë lëshuar 420 dronë dhe 39 raketa të llojeve të ndryshme, 11 prej tyre balistike. “Në tetë rajone janë regjistruar shkatërrime dhe shumë shtëpi private dhe ndërtesa banimi janë dëmtuar. Deri tani raportohet se dhjetëra persona, përfshirë fëmijë, janë plagosur si pasojë e këtij sulmi”, tha ai.

Zelenski vuri në dukje se janë goditur objektet e infrastrukturës së gazit në rajonin e Poltavës, si dhe nënstacionet elektrike në rajonet e Kievit dhe Dnipros. “Shumica e raketave të lëshuara sot u neutralizuan me sukses falë dërgimit të shpejtë nga partnerët tanë të një pjese të raketave të mbrojtjes ajrore të miratuara në takimin e fundit të Ramsteinit. Fatkeqësisht pati edhe goditje. Kjo do të thotë se duhet të vazhdojmë të punojmë edhe më aktivisht”, deklaroi ai.

Zelenski shtoi se, ndërsa Rusia vazhdon përpjekjet për të shkatërruar sistemin energjetik, nevoja për raketa të mbrojtjes ajrore është e përditshme.