Albania News Agency

Presidenti i Ukrainës, Volodymyr Zelensky, zhvilloi një bisedë me Presidenten e Komisionit Evropian, Ursula von der Leyen.

Zelensky deklaroi se situata më e vështirë është në Kiev, Dnipro, rajonet Sumi dhe Donetsk, si dhe në Herson. Ai njoftoi se Bashkimi Evropian do të aktivizojë një mekanizëm të posaçëm emergjence, i cili do të mundësojë sigurimin e shpejtë të financimit për nevojat urgjente të Ukrainës.

Zelensky bëri të ditur se ekipet kanë nisur tashmë punën për këtë mekanizëm dhe shtoi se kanë diskutuar gjithashtu ndihmën shtesë energjetike dhe humanitare në kuadër të përgatitjeve për dimrin. Gjatë bisedës u trajtua edhe procesi i integrimit të Ukrainës në Bashkimin Evropian. Zelensky theksoi se Paketa Vjetore e Zgjerimit të BE-së, e publikuar javën e kaluar nga Komisioni Evropian, përmbante një vlerësim pozitiv për përparimin e Ukrainës. Ai nënvizoi rëndësinë e hapjes së të gjithë grupkapitujve të negociatave dhe fillimit të mbylljes së kapitujve.

Gjatë bisedës u diskutuan edhe kontaktet diplomatike. U bë e ditur se në takimet e zhvilluara javën e kaluar në Bruksel ishte punuar mbi planin e rindërtimit të Ukrainës dhe garancitë e sigurisë nga Evropa. Zelensky deklaroi se kishte koordinuar gjithashtu qëndrimet me von der Leyen lidhur me takimin e planifikuar në Abu Dhabi, duke thënë: "Po bëjmë gjithçka që është e mundur për të siguruar që formati trepalësh të japë rezultate".