Albania News Agency

Presidenti i Ukrainës, Volodymyr Zelensky, njoftoi se ushtria ukrainase ka kryer sulme me rreze të gjatë ndaj infrastrukturës energjetike në brendësi të Rusisë.

Zelensky tha se është goditur një terminal eksporti në rajonin e Rostovit, rreth 250 kilometra larg vijës së frontit.

Ai shtoi se sulme janë kryer edhe ndaj objekteve të naftës në rajonin e Jaroslavlit dhe në Republikën e Udmurtisë, rreth 1.300 kilometra larg kufirit me Ukrainën.

Zelensky theksoi se Ukraina vazhdon të zbatojë planin e saj për operacione me rreze të gjatë, duke synuar të zvogëlojë aftësinë e Rusisë për të financuar luftën.

Duke falënderuar personelin e Forcave të Mbrojtjes së Ukrainës që mori pjesë në operacion, Zelensky tha: "Falënderoj ushtarët e Forcave të Mbrojtjes së Ukrainës për punën e tyre të saktë në atë zonë, e cila deri vonë konsiderohej prapavijë e thellë ruse. Me përgjigjet tona po e kthejmë luftën në Rusi, në mënyrë që të ketë një mundësi për një paqe të denjë."