Albania News Agency

Ministri i Punëve të Jashtme i Italisë, Antonio Tajani, u takua me zëvendëskryeministrin dhe ministrin e Punëve të Jashtme të Çekisë, Petr Macinka, për të diskutuar sigurinë e Evropës, konkurrueshmërinë ekonomike, politikat energjetike dhe migracionin e parregullt.

Në një deklaratë pas takimit, Tajani tha se Italia dhe Çekia dëshirojnë të zhvillojnë marrëdhëniet dypalëshe dhe të gjejnë së bashku zgjidhje për sfidat me të cilat përballet Evropa. Ai bëri të ditur se u diskutuan gjithashtu zhvillimet rajonale, nga Lindja e Mesme deri në Ballkanin Perëndimor, si dhe çështjet e migracionit dhe sigurisë.

Tajani u shpreh se Evropa duhet të përvetësojë një qasje më të fortë dhe pragmatike, duke theksuar se tranzicioni energjetik nuk duhet të ndikojë negativisht në rritjen ekonomike, industri dhe punësim. Ai njoftoi gjithashtu se të dy vendet do të bashkëpunojnë në fushën e energjisë bërthamore të gjeneratës së re.

Tajani deklaroi se mbështetja për Ukrainën do të vazhdojë dhe se siguria e Evropës duhet të forcohet përballë sulmeve kibernetike dhe kërcënimeve hibride. Ai bëri të ditur se të dy ministrat vizituan edhe qendrën e sigurisë kibernetike të Ministrisë së Punëve të Jashtme të Italisë, e cila synon mbrojtjen nga sulmet kibernetike dhe garantimin e vazhdimësisë së shërbimeve për qytetarët.

Ai shtoi se synohet gjithashtu zgjerimi i bashkëpunimit për mbështetjen e investimeve, rritjes ekonomike dhe stabilitetit në Afrikë, si dhe për parandalimin e migracionit të parregullt.