Albania News Agency

Gjatë javëve të fundit tensionet u rritën në mënyrë të rrezikshme, derisa të mërkurën ndodhi një kthesë befasuese: Trump papritur hodhi poshtë ndërhyrjen ushtarake dhe hoqi dorë nga kërcënimet për të vendosur tarifa ndaj disa aleatëve evropianë.

Trump, pas takimit me Sekretarin e Përgjithshëm të NATO-s Mark Rutte në Forumin Ekonomik Botëror në Davos, njoftoi në rrjetet sociale se ishte arritur “korniza e një marrëveshjeje të ardhshme për Grenlandën”.

Kryeministrja daneze mbërriti në Nuuk drejtpërdrejt nga Brukseli, ku të premten herët në mëngjes u takua ballë për ballë me Rutte. Sipas postimit të Rutte në X, ata ranë dakord për “forcimin e parandalimit dhe mbrojtjes në Arktik”.

Pasi u prit në pistë nga kryeministri i Grenlandës Nielsen, Mette Frederiksen tha: “Sot jam në Grenlandë, para së gjithash, për të treguar mbështetjen e fortë të Danimarkës për popullin e Grenlandës. Po kalojmë një periudhë shumë të vështirë, të gjithë mund ta shohin këtë.

Jemi në një situatë serioze. Të gjithë mund ta shohin. Tani ka një rrugë diplomatike dhe politike që do të ndjekim”, tha ajo. Ajo shtoi se vizita e saj ishte një vizitë “pune” për të përgatitur “hapat e ardhshëm”.