Albania News Agency

Presidenti i Ukrainës Zelenski tha se Rusia ka kryer gjatë natës një sulm të gjerë duke përdorur mbi 370 dronë sulmues dhe 21 raketa të llojeve të ndryshme.

Ai theksoi se janë goditur Kievi dhe rrethinat e tij, si dhe rajonet Sumy, Kharkiv dhe Chernihiv. “Në Kharkiv u dëmtuan një maternitet, një konvikt për persona të zhvendosur, një fakultet mjekësie dhe ndërtesa banimi. Deri më tani raportohet për dhjetëra të plagosur, përfshirë edhe një fëmijë. Në kryeqytet dhe zonat përreth, objektivat kryesore të rusëve ishin objektet energjetike. Fatkeqësisht, ky sulm i mori jetën një personi”, tha ai.

Zelenski theksoi se sulmet e Rusisë ndaj infrastrukturës energjetike tregojnë se nuk duhet të ketë vonesa në furnizimin me sisteme të mbrojtjes ajrore. “Këto sulme nuk mund të injorohen — duhet një përgjigje e fortë. Ne mbështetemi në reagimin dhe ndihmën e të gjithë partnerëve tanë. Çdo raketë e prodhuar për Patriot, NASAMS dhe sisteme të tjera ndihmon në mbrojtjen e infrastrukturës kritike dhe u mundëson njerëzve të përballojnë të ftohtin e dimrit. Duhet të sigurojmë zbatimin e plotë të gjithçkaje për të cilën u ra dakord me Presidentin Trump në Davos lidhur me mbrojtjen ajrore”, tha ai.