Albania News Agency

Sipas njoftimit të Ministrisë së Jashtme të Greqisë, ministri Gerapetritis do të zhvillojë një vizitë zyrtare në Nju Jork në periudhën 27–31 janar 2026.

Në deklaratë thuhet se të mërkurën, më 28 janar, në orën 09:00, Gerapetritis do të takohet me Përfaqësuesen Speciale të Sekretarit të Përgjithshëm të OKB-së për Fëmijët dhe Konfliktet e Armatosura, Vanessa Frazier.

Po ashtu bëhet e ditur se në kuadër të anëtarësimit të përkohshëm të Greqisë në Këshillin e Sigurimit të OKB-së për periudhën 2025–2026, të njëjtën ditë në orën 10:00, Gerapetritis do të mbajë një fjalim në seancën e hapur të Këshillit të Sigurimit mbi Lindjen e Mesme, ndërsa në orën 15:30 do të takohet me Sekretarin e Përgjithshëm të OKB-së, Antonio Guterres.

Gjithashtu, ministri Gerapetritis do të jetë folësi kryesor në një aktivitet të organizuar nga think tank-u amerikan Council on Foreign Relations më 28 janar.

Të enjten, më 29 janar, në orën 12:30, Gerapetritis do të marrë pjesë në një tryezë të rrumbullakët me temë “Nga deti i hapur te konsumatori: tregtia detare dhe siguria e ekonomisë globale”, si dhe do të zhvillojë takime me përfaqësues të diasporës greke.