Albania News Agency

Ministria e Jashtme e Ukrainës publikoi një deklaratë lidhur me sulmet ndaj Çernihivit dhe Zaporizhias, të cilat sipas saj u kryen nga Rusia.

Sipas ministrisë, në sulmin me dron ndaj një supermarketi në Çernihiv humbën jetën të paktën dy persona, përfshirë një fëmijë, ndërsa 20 persona u plagosën. Ministria shtoi se pas sulmit shpërtheu një zjarr dhe ekipet e shpëtimit vazhdojnë operacionet në zonë.

Në deklaratë thuhet gjithashtu se po atë ditë Zaporizhia, sipas ministrisë, u godit edhe me bomba ajrore të drejtuara, duke shkaktuar vdekjen e një personi dhe plagosjen e një tjetri.

Ministria e Jashtme e Ukrainës argumentoi se sulmet ruse synojnë të përhapin frikë mes civilëve dhe bëri thirrje për sanksione më të forta, rritje të mbështetjes ushtarake për Ukrainën dhe forcimin e sistemeve të mbrojtjes ajrore.