Albania News Agency

Sipas CCTV-së, Projekti Hidroelektrik Suki Kirar, i realizuar në kuadër të Korridorit Ekonomik Kinë-Pakistan (CPEC), kontribuon në nevojat energjetike të Pakistanit me energji elektrike të pastër, ndërsa forcon edhe bashkëpunimin teknik mes dy vendeve.

Ndërtimi i projektit hidroelektrik me kapacitet 884 megavat, i vendosur në rrethin Mansehra të provincës Khyber Pakhtunkhwa të Pakistanit, filloi në janar 2017. Projekti hyri në funksion në shtator 2024.

Që nga fillimi i funksionimit, Projekti Hidroelektrik Suki Kirar ka prodhuar më shumë se 2,8 miliardë kilovat-orë energji elektrike të pastër. Gjithashtu u bë e ditur se projekti kursen rreth 1,3 milion ton qymyr standard në vit dhe se energjia e prodhuar transmetohet në rrjetin kombëtar të Pakistanit.

Inxhinieri i lartë i projektit, Mubashir Hasan, tha: “Projekti ynë prodhon 884 megavat energji elektrike. Kur hyn në rrjetin kombëtar, do të sjellë përfitime jo vetëm për provincat tona, por për të gjithë vendin”.

Projekti spikat jo vetëm për prodhimin e energjisë elektrike, por edhe për shkëmbimin e njohurive teknike dhe përvojës mes dy vendeve. Inxhinierët pakistanezë dhe kinezë punojnë së bashku në etapa të ndryshme, nga projektimi dhe ndërtimi deri te operimi.

Projekti Suki Kirar konsiderohet gjithashtu një fushë e rëndësishme trajnimi për inxhinierët e rinj pakistanezë, ku ata mund të fitojnë përvojë praktike me teknologji të avancuara.

Inxhinieri Malik Muhannad Danal, i cili punon në projekt, tha se sapo kishte diplomuar kur nisi punën dhe se kishte fituar përvojë të rëndësishme nga inxhinierët kinezë dhe teknologjitë e përdorura.

Danal tha: “Kur erdha këtu, pashë pajisjet më të fundit dhe teknologjinë më të mirë. Besoj se kinezët e mbajnë veten të përditësuar me teknologjinë më të fundit. Kam mësuar shumë dhe kam marrë një sasi të madhe njohurish nga njerëzit më të mirë në terren”.

Korridori Ekonomik Kinë-Pakistan, i nisur në vitin 2013 si një nga projektet kryesore të Nismës Brez dhe Rrugë, ka shënuar përparim ndër vite në fusha të ndryshme si termocentralet, infrastruktura e transportit dhe investimet portuale.

Projekti Hidroelektrik Suki Kirar spikat gjithashtu si një nga investimet e rëndësishme në kuadër të CPEC që forcojnë infrastrukturën energjetike të Pakistanit dhe rrisin prodhimin e energjisë së rinovueshme.