Albania News Agency

Kryeministri kroat Plenkoviç paraqiti vlerësimet e tij mbi zhvillimet aktuale politike dhe ekonomike gjatë mbledhjes së rregullt të organeve të partisë në pushtet, Bashkimi Demokratik Kroat (HDZ).

Plenkoviç deklaroi se qeveria do të marrë vendime të reja për çmimet e karburanteve në periudhën e ardhshme, duke shtuar se përmes rregullimeve të TVSH-së që janë në konsultim publik, do të mundësohet reagim më fleksibël ndaj luhatjeve të çmimeve.

Duke folur për reformën në drejtësi, Plenkoviç tha se zgjedhja e njëkohshme e kryetarit të Gjykatës së Lartë dhe tre gjyqtarëve të Gjykatës Kushtetuese mund të jetë një zgjidhje e përshtatshme për arritjen e konsensusit, duke theksuar se diskutimet në parlament vazhdojnë.

Sa i përket kontakteve rajonale, Plenkoviç përmendi takimet në Mostar të Bosnjë-Hercegovinës dhe theksoi se bashkëpunimi ndërmjet Kroacisë dhe Bosnjë-Hercegovinës në tregti, transport dhe energji po forcohet.

Ai gjithashtu iu referua rezultateve të zgjedhjeve në Hungari, duke thënë se suksesi i Peter Magyar mund të kontribuojë në zgjidhjen e çështjeve të hapura mes dy vendeve.