Albania News Agency

Sipas Axios, shqetësimet e Bessent lidhur me ndikimet financiare u realizuan pjesërisht të hënën, teksa për shkak të ndërhyrjes politike ndaj Fed-it u rritën yield-et e obligacioneve dhe çmimet e arit, ndërsa dollari humbi vlerë.

Zyra e Prokurores së SHBA-së në Uashington, Jeanine Pirro, njoftoi se hetimi ishte nisur pa njoftuar më parë Departamentin e Thesarit, zyrtarë të lartë të Shtëpisë së Bardhë apo Departamentin e Drejtësisë.

Powell, në një deklaratë të bërë të dielën në mbrëmje, tha se nuk kishte kryer asnjë shkelje dhe pretendoi se administrata Trump po e përdorte Departamentin e Drejtësisë si armë, pasi ai nuk kishte mbështetur uljen e normave të interesit në masën apo me shpejtësinë që dëshironte Trump.

Powell tha: “Kërcënimi me akuza penale është rezultat i faktit që Rezerva Federale përcakton normat e interesit sipas vlerësimit më të mirë në interes të publikut, dhe jo duke ndjekur preferencat e Presidentit.”

Sipas burimeve të Axios, shqetësimet e Bessent lidhur me hetimin nuk bazohen vetëm në tregjet financiare. Mandati i Powell si kryetar përfundon në maj dhe administrata shpresonte që ai të jepte dorëheqjen më herët pasi Trump të emëronte pasardhësin e tij.

Një zëdhënës i Departamentit të Thesarit të SHBA-së i tha gjithashtu Axios-it: “Nuk ka asnjë mosmarrëveshje midis Sekretarit Bessent dhe Presidentit Trump. Burimet në lajm nuk flasin në emër të sekretarit.” Sipas burimeve, Bessent nuk e ka vënë në dyshim nevojën e hetimit ndaj Powell dhe nuk e ka mbrojtur kreun e Fed-it në bisedën e tij me Trump.