Albania News Agency

Presidenti i SHBA-së Donald Trump tha se nëse Gjykata e Lartë e SHBA-së anulon tarifat globale tregtare, kjo do të sillte “kaos të plotë”.

Në një mesazh të publikuar në rrjetet sociale, Trump shkroi se në rast se gjykata vendos kundër tarifave, “jemi të fundosur”. Vendimi pritet të merret më herët të mërkurën.

Trump theksoi se do të ishte e vështirë të tërhiqeshin tarifat dhe se bizneset dhe vendet mund të kërkojnë rimbursime. “Do të duhen vite për të kuptuar për çfarë shifrash bëhet fjalë dhe kujt, kur dhe ku duhet t’i paguhen”, tha ai, duke shtuar: “Kjo do të ishte një kaos i plotë dhe do ta bënte pothuajse të pamundur që vendi ynë ta përballojë”.

Gjithashtu, tarifat e gjera globale të shpallura për herë të parë nga Trump në prill të vitit të kaluar po kundërshtohen në gjykatë nga biznese të vogla dhe 12 shtete amerikane, të cilat pretendojnë se presidenti ka tejkaluar kompetencat e tij duke vendosur taksa të reja mbi mallrat e importuara.