Albania News Agency

Masa u shtua në “Listën e Mbulimit” të komisionit dhe i pengoi DJI-së dhe prodhuesve të tjerë të huaj të dronëve të marrin miratimin e FCC-së për të shitur modele të reja dronësh për import ose shitje në SHBA. Në njoftimin e së hënës, agjencia tha se vendimi “do të ulë rrezikun e sulmeve dhe ndërprerjeve të drejtpërdrejta (me dronë), mbikëqyrjes së paautorizuar, rrjedhjes së të dhënave sensitive dhe kërcënimeve të tjera (me dronë) për vendin”.

Kryetari i FCC-së, Brendan Carr, deklaroi se ndërsa dronët ofrojnë potencial për të forcuar sigurinë publike dhe pozicionin e SHBA-së në inovacionin global, “kriminelët, terroristët dhe aktorët e huaj armiqësorë kanë intensifikuar armatosjen e këtyre teknologjive, duke krijuar kërcënime të reja dhe serioze për vendin tonë”.

Vendimi vjen në një kohë kur “skifterët” antikinezë në Kongres kanë shtuar paralajmërimet për rreziqet e sigurisë të dronëve të prodhuar nga DJI, e cila mban mbi 90% të pjesës së tregut global. Megjithatë, përpjekjet për presion në Kongres hasën rezistencë për shkak të ndikimit të mundshëm te bizneset amerikane dhe forcat e rendit. Një gamë e gjerë sektorësh — nga ndërtimi, energjia, bujqësia dhe minierat, deri te policia dhe shërbimet zjarrfikëse lokale në mbarë vendin — përdorin dronë të prodhuar nga DJI.

Megjithatë, ky rregull nuk do t’i ulë në tokë mijëra dronë që tashmë janë të vendosur në SHBA. FCC deklaroi se vendimi “nuk prek dronët ose komponentët e dronëve që aktualisht shiten në Shtetet e Bashkuara”, që do të thotë se dronët e miratuar më parë nga FCC mund të vazhdojnë të përdoren. Një zëdhënës i FCC-së nuk iu përgjigj menjëherë pyetjeve mbi planet e mundshme për një ndalim me efekt prapaveprues.