Albania News Agency

Sipas BBC-së, platforma e videove të shkurtra TikTok njoftoi se ka bërë të pavarura operacionet e saj në SHBA duke i ndarë nga pronari kinez ByteDance. Marrëveshja e re u realizua pas viteve të tensioneve Uashington–Pekin dhe shqetësimeve për sigurinë kombëtare.

Kërcënimi për ndalimin e TikTok, i ngritur gjatë presidencës së Donald Trump, u konkretizua me një ligj të miratuar në vitin 2024 nën administratën Biden, i cili kërkonte që ByteDance të shiste operacionet e saj në SHBA investitorëve amerikanë. Platforma do të ndalohej në SHBA nëse shitja nuk do të përfundonte deri në janar 2025.

Sipërmarrja e sapokrijuar TikTok USDS Joint Venture LLC do të mbrojë të dhënat e përdoruesve amerikanë, aplikacionet dhe algoritmin me masa të privatësisë së të dhënave dhe sigurisë kibernetike. Bordi drejtues do të ketë shtatë anëtarë, shumica prej të cilëve shtetas amerikanë. Adam Presser u emërua CEO.

Tre investitorët kryesorë të operacioneve në SHBA janë Oracle, Silver Lake dhe MGX, secili me nga 15% aksione. ByteDance do të mbajë 19,9%. Pjesa e mbetur prej 35,1% do të ndahet midis kompanive teknologjike dhe të investimeve. Oracle do të jetë përgjegjëse për sigurimin e të dhënave të përdoruesve dhe mbikëqyrjen e ritrainimit të algoritmit.

Algoritmi që qëndron pas popullaritetit të platformës tani do të ritrainohet vetëm me të dhënat e përdoruesve në SHBA dhe do të sigurohet në mjedisin cloud të Oracle në SHBA. Ekspertët thonë se kjo mund ta bëjë përvojën e TikTok në SHBA të ndryshme nga versioni global dhe të ndryshojë rekomandimet e përmbajtjes.

Marrëveshja garanton vazhdimin e operacioneve të TikTok në SHBA, ku platforma ka rreth 200 milionë përdorues, dhe i jep fund debateve të gjata ligjore dhe politike me Kinën.