Albania News Agency

Sipas deklaratës së Ministrisë së Punëve të Jashtme të Ukrainës, Ukraina refuzon dhe dënon ultimatumet dhe shantazhin e qeverive të Hungarisë dhe Republikës së Sllovakisë në lidhje me furnizimin me energji midis vendeve.

Në deklaratë thuhet: „Hapa të tillë janë provokues dhe të papërgjegjshëm në kontekstin e sulmeve të gjera dhe të synuara të Rusisë kundër infrastrukturës energjetike të Ukrainës dhe përpjekjeve të Moskës për t’i privuar ukrainasit nga energjia elektrike, ngrohja dhe gazi në kushte të ftohti ekstrem; gjithashtu ato kërcënojnë sigurinë energjetike të të gjithë rajonit.“

Po ashtu theksohet se në këtë mënyrë qeveritë e Hungarisë dhe Sllovakisë jo vetëm që i shërbejnë interesave të agresorit, por edhe dëmtojnë kompanitë e tyre energjetike që furnizojnë mbi baza tregtare.

Në deklaratë shtohet gjithashtu:

„Ukraina ka qenë gjithmonë dhe mbetet një partner i besueshëm energjetik i BE-së dhe një vend tranziti për burimet energjetike. Megjithatë, në dritën e kërcënimeve të pabazuara dhe të papërgjegjshme të bëra ditët e fundit nga Budapesti dhe Bratislava, Ukraina po shqyrton mundësinë e aktivizimit të Mekanizmit të Paralajmërimit të Hershëm të parashikuar në Marrëveshjen e Asociimit ndërmjet Ukrainës dhe Bashkimit Evropian. I bëjmë thirrje qeverive të Hungarisë dhe Republikës së Sllovakisë për bashkëpunim konstruktiv dhe sjellje të përgjegjshme.“