Albania News Agency

Ghebreyesus tha se OBSH-ja të hënën evakuoi 33 pacientë dhe 109 persona shoqërues nga Gaza drejt Jordanisë, dhe se disa pacientë do të dërgohen në vende të tjera për trajtim të specializuar në ditët në vijim.

Ai theksoi vonesat gjatë procesit të evakuimit, duke vënë në dukje se pacientët që arritën nga pika e kalimit Kerem Shalom në urën Allenby së bashku me ekipin e OBSH-së, u mbajtën në pritje për më shumë se 4 orë, duke rrezikuar gjendjen e tyre tashmë të brishtë shëndetësore.

Ghebreyesus deklaroi se që nga tetori i vitit 2023, më shumë se 10 mijë pacientë janë evakuuar nga Gaza së bashku me mbi 12 mijë shoqërues drejt më shumë se 30 vendeve. Ai theksoi se më shumë se 16 500 pacientë ende presin evakuimin, pasi nuk kanë qasje në trajtim të avancuar mjekësor brenda Gazës.

Ai u bëri thirrje më shumë vendeve që të pranojnë këta pacientë dhe t’u sigurojnë atyre qasje në shërbime të specializuara mjekësore. Ghebreyesus gjithashtu kërkoi hapjen e të gjitha korridoreve të evakuimit, përfshirë rrugët drejt Jerusalemit Lindor dhe Bregut Perëndimor, si dhe përshpejtimin e kalimit të autokolonave mjekësore në pikat kufitare.