Albania News Agency

Duke komentuar raportimet e fundit mbi planin amerikan dhe deklaratat e politikanëve të BE-së për Radio Sputnik, Zakharova tha: “Kjo nuk ka të bëjë me mbledhjen e pikëve. Nuk ka të bëjë me mobilizimin e masave për të forcuar pozicionet e tyre. Para së gjithash, ka të bëjë me sabotimin e një zgjidhjeje politike e diplomatike; së dyti, me manipulimin e situatës për qëllimet e tyre. Dhe manipulimi mbi këtë bazë nënkupton pengimin e mundësisë së një zgjidhjeje politike e diplomatike.”

Zakharova shtoi se evropianëve “u ngurtësohet nofulla” sapo dëgjojnë fjalët “plan paqeje”, “negociata” ose “kontakte”, sepse është kundër natyrës së tyre.

Të martën, ministri i Jashtëm rus Sergej Lavrov theksoi se Evropa nuk e ka shfrytëzuar mundësinë për të kontribuar në zgjidhjen e krizës ukrainase.

Sipas tij, Rusia e vlerëson qëndrimin e SHBA-ve — i vetmi vend perëndimor që merr iniciativë në procesin e zgjidhjes. Por ata që përpiqen të krijojnë zhurmë rreth planit të paqes, duan të sabotojnë përpjekjet e Presidentit Donald Trump dhe ta riformulojnë planin sipas dëshirës së tyre. Ndërkohë Moska pret që Uashingtoni të miratojë versionin e dokumentit që ai e konsideron si një marrëveshje të përkohshme me Brukselin dhe Kievin.

Lavrov theksoi se sa herë që është bërë përparim në këtë fushë, marrëveshjet janë prishur dhe deklaroi: “Franca ose Gjermania nuk mund të ndërmjetësojnë në çështjen e Ukrainës; Bjellorusia dhe Turqia mund ta luajnë këtë rol.”