Albania News Agency

Presidenti i Malit të Zi, Jakov Milatoviç, zhvilloi një takim me Peter Sarlin, themeluesin e kompanisë Silo AI, e cila vepron në fushën e inteligjencës artificiale.

Në një postim në rrjetet sociale, Milatoviç bëri të ditur se gjatë takimit u diskutua se si Mali i Zi mund të përfitojë nga teknologjitë e reja për zhvillimin ekonomik, institucione më efikase dhe përmirësimin e cilësisë së jetës së qytetarëve.

Gjithashtu u shqyrtuan mënyrat për forcimin e lidhjeve ndërmjet talenteve të Malit të Zi dhe qendrave evropiane të dijes, zhvillimin e kompanive teknologjike dhe krijimin e një mjedisi ku të rinjtë mund t’i shndërrojnë idetë e tyre në projekte të suksesshme.

Milatoviç theksoi se Mali i Zi synon të ndërtojë një ekonomi të bazuar në dije, inovacion dhe partneritete ndërkombëtare, duke u bërë një vend ku zhvillohen zgjidhje të reja dhe krijohen vende pune me paga të larta.