Albania News Agency

Ministri i Jashtëm i Gjermanisë, Johann Wadephul, bëri një deklaratë lidhur me zhvillimet në Gaza.

Në një postim në rrjetet sociale, Wadephul e cilësoi pranimin nga Hamasi të një plani veprimi për çarmatimin si një „lajm shpresëdhënës“.

Wadephul mirëpriti marrëveshjen e arritur me mbështetjen e Shteteve të Bashkuara, Egjiptit, Katarit, Turqisë dhe koordinatorit të Kombeve të Bashkuara Nikolay Mladenov, duke theksuar rëndësinë e fazës së ardhshme të procesit.

“Është me rëndësi thelbësore të arrihet përparim i vërtetë dhe Hamasi të çarmatoset realisht. Hamasi nuk duhet të përbëjë më kurrë një kërcënim për Izraelin,” tha Wadephul.

Ministri gjerman mirëpriti gjithashtu hapat e Izraelit për vendosjen e Forcës Ndërkombëtare të Stabilitetit (ISF).

Wadephul theksoi se Gjermania është e gatshme të ofrojë ndihmë humanitare dhe mbështetje për rimëkëmbjen e hershme të popullsisë së Gazës, duke shtuar se pikat shtesë të kalimit drejt Gazës duhet të hapen pa vonesë.

Wadephul njoftoi se Gjermania do të kontribuojë në zbatimin e marrëveshjes.